Kryetari i Prishtinës, Përparim Rama, ka reaguar ashpër ndaj deklaratës së kryeministrit Albin Kurti, i cili një ditë më parë tha se “nuk e jep buxhetin për komunat që nuk bashkëpunojnë me qeverinë”.
Në një postim të gjatë në rrjete sociale, Rama e ka cilësuar këtë deklaratë si “skandaloze” , duke theksuar se buxheti i shtetit nuk mund të përdoret si mjet ndëshkimi politik.
“Deklarata ‘nuk e jap buxhetin për…’ është skandaloze. Cilin buxhet, Albin? Të popullit që e mban këtë shtet me tatime, punë dhe durim, apo të partisë që e ke shndërru në pronë private?”, ka shkruar Rama.
Kreu i Prishtinës ka akuzuar Kurtin se po e trajton pushtetin si pronë personale dhe se po e shndërron qeverisjen në një sistem autokratik që shpërblen besnikërinë partiake.
“Buxheti i shtetit nuk është shpërblim as ndëshkim, është detyrim kushtetues! Ai nuk shpërndahet sipas besnikërisë partiake. Në demokraci, kush e përdor paranë publike për të ndëshkuar kundërshtarët, është autokrat që fshihet pas fjalëve populliste”, ka shtuar Rama.
Ai paralajmëroi se një qasje e tillë përbën “rrezik institucional”, duke theksuar se Kosova është shtet demokratik dhe se pushteti duhet të kuptohet si përgjegjësi, jo privilegj.
