Kryetari i Prishtinës, Përparim Rama, u është kundërpërgjigjur Bashës dhe ministrit Gashani lidhur me çështjen e organizimit të Lojërave Mesdhetare “Prishtina 2030”.
Përmes një reagimi publik, Rama ka kërkuar që, siç është shprehur, të ndalen të pavërtetat dhe akuzat në Kuvend, duke theksuar se në vend të deklaratave politike nevojitet punë konkrete për realizimin e këtij organizimi.
Ai ka bërë të ditur se mbështet organizimin e Lojërave Mesdhetare dhe përfshirjen e qyteteve të tjera, por vetëm në përputhje me marrëveshjet e nënshkruara dhe Masterplanin e miratuar.
Rama ka theksuar se Prishtina dhe ai personalisht kanë vetëm tri nga 12 votat në Komitetin Organizativ, ndërsa shumica vendimmarrëse, sipas tij, i takon Qeverisë dhe Komitetit Olimpik të Kosovës.
Në reagimin e tij, kryetari i Prishtinës ka ngritur shqetësime edhe për obligimet financiare dhe infrastrukturore, duke pretenduar se vonesat në pagesat ndaj Komitetit Ndërkombëtar dhe përpjekjet për ndryshimin e Masterplanit po e rrezikojnë organizimin e Lojërave.
Ai gjithashtu ka kritikuar kryeministrin Albin Kurti, duke e akuzuar se po e përdor këtë çështje për agjendë politike dhe po nxit përçarje mes qyteteve.
Në fund, Rama i ka bërë thirrje Qeverisë që të përmbushë obligimet e marra, duke theksuar se koha për realizimin e projektit po kalon.
“Qytetarët meritojnë t’i shohin Lojërat të realizohen me sukses dhe Kosovën të dalë faqebardhë para botës. Kuvendi meriton dinjitet. Qytetarët meritojnë të vërtetën. Kosova meriton që fjala e dhënë në emër të saj të mbahet”, ka shkruar Rama.
