“Plan operativ se po afrohet vera” – Detaje nga përgjigja e Policisë për forcat e shtuara në Skenderaj

Të enjten në Skenderaj ka ndodhur një incident ku i përfshirë ishte kryetari i kësaj komune Sami Lushtaku dhe kryetari i degës së LVV-së në këtë komunë, Hysni Mejani.

Ngjarja ka qenë temë kryesore në opinion publik.

Por, këtë mbrëmje njësitë speciale kanë zbritur në qytetin e Skenderajit, kjo është intepretuar nga zyrtarë të PDK-së si e panevojshme.

Prokuroria Themelore në Mitrovicë, ka njoftuar se për incidentin e sotëm në Skënderaj, janë ndaluar për 48 orë E.L., dhe B.N., të dyshuar për kryerjen e veprës penale “Lëndimi i lehtë trupor”.

Trupat policore kanë vazhduar të qëndrojnë, duke pasuar me një grumbullim të qytetarëve para Stacionit të Policisë në Skenderaj.

Në mesin e tyre edhe ish-deputetja Ganimete Musliu, e cila ka kërkuar sqarim se pse ka kaq shumë policë.

Në përgjigjen e policisë u tha se është vetëm një plan operativ, siç u shpreh, për shkak se vera po vjen dhe ka më shumë qarkullim të automjeteve.

“Një pjesë e Njësisë Speciale e kanë vetëm plan operativ për shkak se është vera duke u afruar dhe ka më shumë qarkullim të automjeteve, nuk është asgjë për t’u shqetësuar”, thuhet në përgjigjen e policisë.

Por, kjo përgjigje nuk është pranuar nga Musliu, duke e quajtur këtë si tallje me qytetarët e Skenderajt.

“Kjo është tallje me qytetarët e Skenderajt dhe nuk kalon kjo tallje”, tha Musliu