“Po mbes pa votuar”, e moshuara zhgënjehet pasi s’arrin ta gjejë emrin në listën e votuesve në kryeqytet

Në Prishtinë, Fakulteti i Edukimit vazhdon të jetë qendra e vetme e votimit me kusht, qendër kjo që në mëngjes ka pasur disa telashe.

Kjo qendër nuk është hapur me kohë, teksa një e moshuar, Nyzaqete Kusari, përkundër që është banore e kryeqytetit nuk ka pasur mundësi të votojë pasi s’e ka gjetur emrin e saj në listë.

Ajo është shprehur e zhgënjyer me këtë fakt, pasi tha se që nga Kosova e pasluftës nuk i ka ndodhur një situatë e tillë.

“Unë kam votuar gjithmonë në lagje. Këtu thanë që s’e kam emrin, nuk mund të votosh. As në lagje nuk e kisha emrin në listën e votuesve. Përfundimisht po mbes pa votuar. Jam zhgënjyer. Kurrë deri më tani nuk më ka ndodhur që të mos arrij të votojë”, tha ajo.

Kanë mbetur rreth 50 minuta deri në mbylljen e vendvotimeve në të gjithë Kosovën për rundin e parë të zgjedhjeve lokale.