Policët rregullojnë me paratë e rrogës veturën zyrtare të Policisë, reagon Ramadani: A ka më keq se kaq? Në vend se t’i gëzojnë fëmijët e tyre…

Një ngjarje e ndodhur sot ka ngritur shqetësime për Burim Ramadanin e Aleancës, e cila ka të bëjë me kushtet e punës së zyrtarëve policorë.

Siç ka njoftuar Ramadani, sot një veturë inteligjente e Policisë me targat “01-301-PZ”, e cila përdoret për kontrollin e trafikut, është prishur.

Për rregullimin e të njëjtës, Ramadani tha se po merren privatisht vetë policët, ku me paratë e pagës së tyre po e financojnë rregullimin teknik.

“Sot, policët e rregullojnë privatisht veturën e policisë. Vetura inteligjente e Policisë me targat 01-301-PZ është prishur dhe policët vet, nga paga e vet, po e rregullojnë!

Policia ka mbetur pa vetura të domosdoshme trafiku. Pa sistem të duhur të rregullimit të tyre. Policët me atë pak pagë që kanë, në vend se të gëzojnë fëmijët e tyre, duhet të harxhojnë në rregullimin e veturës së policisë. Përndryshe, nuk mund të kryejnë punën e tyre”, tha ai.

Ai gjithashtu i bëri thirrje Prokurorisë për hetim ndaj Ministrisë së Brendshme.

“A ka më keq se kaq? Ngjarja është e sotme (që nuk është e vetmja) dhe është rrënqethëse. Ndërsa, sipas raportit të Auditorit Gjeneral, MPB po keqmenaxhon e zhvat paratë e popullit. Alo…Prokuroria!”, tha ai.