Policia e Kosovës: 37 persona u shoqëruan për intervistim gjatë manifestimeve të “Vidovdanit”

Policia e Kosovës ka njoftuar se manifestimet e mbajtura sot me rastin e “Vidovdanit” janë zhvilluar të qeta dhe pa incidente të mëdha, falë masave të planifikuara dhe operative të ndërmarra për ruajtjen e rendit dhe sigurisë.

Sipas Policisë, gjatë aktiviteteve janë shoqëruar në stacion policor 37 persona për intervistim, pasi dyshohet se kanë provokuar pjesëmarrësit me thirrje provokuese që përmbanin elemente të nxitjes së urrejtjes, në kundërshtim me dispozitat ligjore. Po ashtu, një person është gjobitur për prishje të rendit dhe qetësisë publike.

Pas intervistimit, të 37 personat janë proceduar në gjykatë dhe janë në pritje të vendimit të saj.

Policia bëri të ditur se pas përfundimit të aktiviteteve, të gjithë pjesëmarrësit janë shpërndarë qetësisht, ndërsa falënderoi qytetarët për bashkëpunimin dhe ritheksoi përkushtimin për garantimin e rendit, sigurisë dhe zbatimin e Kushtetutës së Republikës së Kosovës.