Presion pasi publikoi gjendjen e mjerueshme në Pediatrinë e QKUK-së, Arianit Koci merr përsipër përfaqësimin jurdikit të Aulona Memetit

Avokati i njohur, Arianit Koci ka njoftuar se ka marrë përsipër përfaqësimin juridik të Aulona Memetit, nënës së djali dyvjeçar, e cila publikoi gjendje e mjerueshme në Pediatrinë e QKUK-së, pasi e dërgoi për mjekim.

Ai tha se Memeti vendosi të bëjë publike këtë shqetësim pasi sipas deklarimeve të saj, nuk kanë marr trajtim adekuat, teksa siç tha ajo, u përball me presion nga zyrtarë të institucionit.

“Me reagimin janë bërë publike edhe fotografi. Ato paraqesin gjendjen e ambienteve në momentin kur djali i saj po trajtohej. Shëndetësia publike në Kosovë ka vite që është objekt shqetësimi serioz. Ky rast nuk mund të shihet i shkëputur nga ai realitet. Kjo nuk do të thotë se përgjegjësia është kolektive. Përgjegjësia është gjithmonë individuale dhe duhet të përcaktohet mbi bazën e fakteve. Megjithatë, kur probleme të ngjashme përsëriten ndër vite, nuk mund të anashkalohet as përgjegjësia institucionale dhe strukturore”, tha ai.

Ai tha se ky hap për përfaqësim juridik të Memetit vjen si masë mbrojtëse kundrejt presionit.

“Si përfaqësues juridik i Aulona Memetit, do të angazhohem që të drejtat e klientes sime të mbrohen plotësisht dhe që ndaj saj të mos ushtrohet asnjë formë presioni”, tha ai.