Problemet me rrymë, kryetari i KQZ-së: Është njoftuar KEDS-i, shpresojmë të mos ndalet në orët kur bie terri

Kryesuesi i KQZ-së, Kreshnik Radoniqi në një konferencë për media dha detajet më të fundit nga procesi zgjedhor i 28 dhjetorit.

Ai foli rreth problemeve me energji elektrike në disa komuna, dhe për hapat që janë ndërmarrë në rregullimin e këtij telashi.

“Jemi duke pranuar raportime të ndryshme nga qendrat e votimit lidhur me ecurinë e procesit zgjedhor. Sipas raportit të orës 15:00, në dhomën operative të KQZ-së janë raportuar disa probleme të tjera me mungesë të energjisë elektrike në tri qendra votimi në komunën e Skenderajt, dy në komunën e Malishevës, dhe dy qendra të tjera në Novobërdë dhe Obiliq. Për të gjitha këto raste është njoftuar KEDS-i për t’i ndërmarrë hapat e nevojshëm në rikthimin e energjisë elektrike dhe sipas informacioneve kjo ka ndodhur për një kohë shumë të shpejtë”, tha ai.

Sipas tij, ndërprerjet e energjisë elektrike nuk janë të gjata, pasi siç thotë ai, po intervenohet shpejt nga ekipet kompetente.

“Shpresojmë që s’do të kemi ndërprerje të rrymës prej orëve kur do të bie terri. Por metët të shohim. Integritetin e zgjedhjeve jodomosdoshmërisht mund ta cenojë energjia elektrike. Por do të shohim”, ka thënë Radoniqi.

“Do të sigurohemi që s’do t’i lëjmë në terr me votu. Por procesi i votimit nuk ndalet”, ka shtuar ai.

Pos tjerash, Radoniqi bëri të ditur edhe pjesëmarrjen e qytetarëve që kanë ushtruar të drejtën e votës deri në orën 15:00.

“Po ashtu duke u mbështetur në të dhënat preliminare që kemi marrë nga 96% e vendvotimeve, numri i qytetarëve me të drejtë vote që kanë votuar deri në orën 15:00 është 572 mijë e 726 votues, apo 28.65% nga 1 milion 999 e 204 votues”, tha ai.