Prokuroria rrëzon pretendimin për “bllokimin e buxhetit” të Prishtinës

Ministria e Financave ka bërë të ditur se ka pranuar njoftimin nga Prokuroria për hedhjen poshtë të kallëzimit penal të bërë nga zyrtarë të Komunës së Prishtinës, lidhur me pretendimet për bllokim të buxhetit komunal.

Sipas Ministrisë, kallëzimi ishte ngritur me pretendimin se zyrtarët e saj kishin bllokuar buxhetin e Komunës së Prishtinës.

Ministria ka deklaruar se vonesa në buxhetin e vitit 2025 kishte ardhur si pasojë e dorëzimit me vonesë të buxhetit nga Komuna, disa muaj pas afatit ligjor dhe pasi Ligji për Buxhetin ishte miratuar nga Kuvendi.

Sipas saj, kjo kishte bërë që buxheti i Komunës të mos përfshihej në Ligjin e Buxhetit dhe të pamundësohej alokimi dhe shfrytëzimi i plotë i tij.

Në reagim, Ministria ka mirëpritur epilogun e çështjes, duke thënë se ai dëshmon se pretendimet ndaj stafit të saj ishin të pabazuara.

“Ministria e Financave mirëpret epilogun e kësaj çështjeje që vërteton se akuzat ndaj stafit të Ministrisë ishin të pabaza”, thuhet në reagim.

Ministria ka theksuar se do të vazhdojë punën në përputhje me ligjin dhe me, siç ka thënë, qasje profesionale.