Protestat masive anti-qeveritare në Iran, ndërprerje e internetit qe 60 orë

Ndërprerja e internetit në Iran ka zgjatur tashmë më shumë se 60 orë, ndërsa një valë protestash antiqeveritare po përfshin vendin, ka raportuar organizata mbikëqyrëse NetBlocks. Kompania e ka quajtur këtë ndërprerje një “kërcënim të drejtpërdrejtë” për sigurinë publike.

Trazirat, të nxitura nga vështirësi të rënda ekonomike, kanë vazhduar prej dy javësh dhe janë përhapur në më shumë se 180 qytete në të gjithë Iranin, sipas organizatës për të drejtat e njeriut me bazë në SHBA, HRANA.

“Ndërprerja e internetit në Iran tani ka kaluar shifrën e 60 orëve, ndërsa niveli i lidhjes kombëtare vazhdon të qëndrojë rreth 1% të niveleve normale,” tha NetBlocks në një postim në X të dielën në mëngjes, sipas kohës lokale. “Ky masë censure paraqet një kërcënim të drejtpërdrejtë për sigurinë dhe mirëqenien e iranianëve në një moment kyç për të ardhmen e vendit.”

Monitoruesi me bazë në Mbretërinë e Bashkuar raportoi shenjat e para të mungesës së lidhjes në internet në Iran mbrëmjen e 8 janarit, përmes një postimi në X.

Sipas HRANA-s, të paktën 78 protestues janë vrarë dhe më shumë se 2,600 janë arrestuar në lidhje me demonstratat e vazhdueshme.

Një banor i Teheranit tha se ndërprerja e internetit po i shtyn edhe më shumë njerëz të dalin në rrugë për të protestuar, ndërsa kineastë të njohur iranianë i kanë dënuar bllokimet e internetit duke i quajtur “mjete represioni”.