Kryeministri i Shqipërisë, Edi Rama, në fjalimin e tij në Forumin e Paqes në Paris, kritikoi Bashkimin Evropian për mungesën e një strategjie të qartë për paqen në raport me luftën në Ukrainë.
“Ende nuk ka një plan europian paqjeje. Ka vetëm një qasje binare ndaj një konflikti që ka potencial të jashtëzakonshëm për të degjeneruar në diçka katastrofike. Paralelisht me luftën dhe mbështetjen për Ukrainën, BE duhet të ketë planin e vet të paqes”, deklaroi Rama.
Ai theksoi se paqja duhet të varet nga qëndrimet e vendeve demokratike, jo nga dëshirat e palëve në konflikt: “Nuk ka të bëjë me atë që do Rusia… Nuk mund të refuzosh të mendosh për paqen vetëm sepse tjetri nuk e do. Nuk e di nëse Putini e do paqen. Që Putini do luftë është e qartë, çdo ditë.” Rama e cilësoi luftën në Ukrainë si “konfliktin e parë të madh pa asnjë kanal komunikimi”, duke paralajmëruar për rrezikun e përfshirjes së fuqive bërthamore.