Rama: Nesër vuloset hapja e fazës përmbyllëse të negociatave me BE’në, Shqipëria është gati

Kryeministri i Shqipërisë, Edi Rama ka deklaruar se shteti shqiptar është më afër se kurrë me Bashkimin Evropian.

Nga Durrësi, në 35-vjetorin e Partisë Socialiste, Rama është shprehur se nga nesër, fillon mbyllja e grupkapitujve, me konferencën ndërqeveritare Shqipëri-BE në Bruksel.

“Qëllon edhe që sot të jetë dita përpara mbledhjes, konferencës ndërqeveritare Shqipëri-BE nesër, ku do të vuloset hapja e fazës përmbyllëse të negociatave me BE. Shqipëria, pasi hapi të gjitha kapitujt në kohë rekord, tanimë konsiderohet e gatshme për të filluar nga mbyllja e kapitujve të negociatave.”, ka deklaruar Rama.

Kryeministri shqiptar ka thënë se konferenca e nesërme zhvillohet sipas kalendarit, me synimin e përbashkët që negociatat e anëtarësimit të mbyllen brenda 2027.

“Është një majë që tani e prekim me sy dhe rrugën e kemi të piketuar. Edhe kohën për ta zhvilluar atë rrugë e kemi të planifikuar. Jemi sot, më afër se asnjëherë BE”, ka thënë Rama.