Ramadani: Paraqitjen para mediave e kanë uzurpuar një rreth i vogël, zërat kundër ngërçit në VV janë të shumtë

Analisti Burim Ramadani ka thënë se brenda Vetëvendosjes ka zëra që e kundërshtojnë bllokimin. Ai ka thënë ata janë të shumtë. Ramadani shton se paraqitjen para mediave “e kanë uzurpuar një rreth i vogël”.

Ramadani tha se ishte e pritur që dikur do të dalin “zëra normaliteti” nga Grupi Parlamentar, pasi sot deputetja e VV-së Shqipe Selimi nuk mori pjesë në votim kur u propozua Donika Gërvalla si kryeparlamentare.

Ishte e pritur se dikur në Grupin Parlamentar të VV-së do të dalin zëra normaliteti. Kjo nuk duhet të jetë apo nuk duhet të shpjegohet si diçka për motive individuale, por për kundërshtim konceptual e parimor të bllokimit të Kosovës që po i bëjnë.

Ngritja e zërit mospajtues duhet të vazhdojë. Duhet kundërshtuar bllokimin dhe taktikat që e mbajnë ngërçin, sepse ky bllokim po e çon shtetin e Kosovës në kolaps. Ka shpresë që Grupi Parlamentar i VV-së do të demokratizohet.

Anipse me shumë vonesë, pas kësaj edhe në organet partiake do të fillojnë të flasin lirshëm mendimet, pa pasur frikën e linçimit!

P.S Në diskutime jopublike, zërat e tillë kundërshtues ndaj bllokimit brenda VV-së janë të shumtë. Në diskutimet publike, rolin e paraqitjes para mediave e kanë uzurpuar një rreth i vogël.