Rexhepi: Nuk guxojmë të lejojmë që atë që e fituam me gjakun e dëshmorëve ta humbim për kryeneqësinë e një politikani pa identitet

Familja e dëshmorëve Beqir e Rexhep Rexhepi nga Qirezi kanë reaguar pas pezullimit të Dialogut Strategjik nga ShBA-ja, shkruan GazetaDemos.

Fikret Rexhepi përmes një postimi në Facebook tha se pjesëtar i një familjeje që ka dhënë gjithçka për lirinë dhe pavarësinë e Kosovës, nuk mund të qëndroj i heshtur përballë zhvillimeve të fundit që rrezikojnë marrëdhënien tonë historike me SHBA-të.

“Ndërprerja e dialogut strategjik nga SHBA është një sinjal alarmi për vendin tonë. Kjo nuk është çështje partie apo pushteti, por çështje interesi kombëtar. Qasja e mbyllur, arrogante dhe përçarëse e Kryeministrit Kurti ndaj aleatëve tanë më të rëndësishëm po e dëmton rëndë pozitën ndërkombëtare të Kosovës dhe të ardhmen euroatlantike të saj”, shkruan Rexhepi në Facebook.

Postimi i plotë:

Si politikan i ri dhe si pjesëtar i një familjeje që ka dhënë gjithçka për lirinë dhe pavarësinë e Kosovës, nuk mund të qëndroj i heshtur përballë zhvillimeve të fundit që rrezikojnë marrëdhënien tonë historike me Shtetet e Bashkuara të Amerikës.

Ndërprerja e dialogut strategjik nga SHBA është një sinjal alarmi për vendin tonë. Kjo nuk është çështje partie apo pushteti, por çështje interesi kombëtar. Qasja e mbyllur, arrogante dhe përçarëse e Kryeministrit Kurti ndaj aleatëve tanë më të rëndësishëm po e dëmton rëndë pozitën ndërkombëtare të Kosovës dhe të ardhmen euroatlantike të saj.

Kosova ka ekzistuar dhe ka mbijetuar falë mbështetjes së aleatëve, në krye me SHBA-në. Prandaj, është papërgjegjësi historike që për interesa të ngushta politike të sakrifikohet partneriteti që ka ndërtuar lirinë, sigurinë dhe shtetësinë tonë.

Koha është për reflektim. Kosova ka nevojë për lidership që bashkëpunon me miqtë, jo që i largon ata.

Nuk guxojmë të lejojmë që atë qe e fituam me gjakun e dëshmorëve dhe sakrificën e popullit ta humbim për kryeneqësinë e një politikani pa identitet.