Kryetari i Skenderajt, Sami Lushtaku, ka përgëzuar rininë e Skenderajt për organizimin e protestës së nesërme në mbështetje të ish-krerëve të UÇK-së të dënuar nga Gjykata Speciale në Hagë.
Lushtaku ka bërë të ditur se protesta do të mbahet të hënën, në ora 12:00, në sheshin “Adem Jashari” në Skenderaj, ndërsa ka theksuar se iniciativa ka nisur nga nxënësit e shkollave të mesme dhe pritet të mbështetet edhe nga qytetarët.
“Rinia jonë nuk ka heshtur kurrë përballë padrejtësive. Në çdo kohë, ajo ka qenë zëri që ka kërkuar drejtësi, ka mbrojtur dinjitetin dhe ka sjellë ndryshimin për vendin tonë”, ka shkruar Lushtaku.
Ai ka deklaruar se protesta do të jetë një shprehje e pakënaqësisë ndaj dënimeve të shqiptuara në Hagë dhe mbështetje për ish-pjesëtarët e UÇK-së.
“Ky zë do të jetë i bashkuar dhe i fuqishëm në mbështetje të çlirimtarëve dhe në kundërshtim me një aktgjykim politik, të cilin ne nuk do ta pranojmë kurrë!”, ka thënë Lushtaku.
