Kryetari i Skenderajt, Sami Lushtaku ka reaguar pas vdekjes së komandantit të UÇK-së, Sahit Jashari.
Lushtaku nderoi veprën e tij dhe kontributin e dhënë për atdhe, duke e përshkruar si bashkëluftëtar besnik të heroit Adem Jashari.
Lushtaku njohu guximin e pashoq të Jasharit teksa uroi që shpirti i tij të prehet pranë të rënëve për atdhe.
Postimi i plotë:
Sahit Jashari na la!
Sonte, para pak çastësh, u nda nga jeta një prej burrave më të mëdhenj të kësaj toke, një prej themeluesve të Ushtrisë Çlirimtare të Kosovës, luftëtari i orëve të para dhe bashkëluftëtari besnik i Komandantit Legjendar Adem Jashari dhe i gjithë ne të tjerëve, Sahit Jashari.
U shua një zemër që rrahu gjithë jetën vetëm për atdheun. Një burrë që nuk njohu frikë, nuk njohu dorëzim dhe nuk kërkoi asgjë për vete. Ai jetoi për Kosovën dhe për lirinë e saj.
I përndjekur e i dënuar nga regjimi i Millosheviçit, ai qëndroi i palëkundur në rrugën e lirisë. Në Epopenë e lavdishme të 5, 6 dhe 7 marsit 1998, ai dha 13 anëtarë të ngushtë të familjes në altarin e lirisë, duke e vulosur me gjak rrugën e Kosovës drejt çlirimit.
Sonte, zemra e Sahit Jasharit pushoi së rrahuri, por emri i tij do të jetojë përgjithmonë në historinë e kombit tonë. Drenica humbi një bir të madh, Kosova një luftëtar të shquar, ndërsa ne humbëm një shok e një bashkëluftëtar që me jetën dhe veprën e tij na mësoi çfarë do të thotë sakrifica dhe dashuria për atdheun.
Lamtumirë, trimi ynë! Prehu i qetë pranë dëshmorëve të familjes Jashari dhe të gjithë atyre që ranë për lirinë e Kosovës.
Lavdi e përjetshme jetës dhe veprës së Sahit Jasharit! SL
