Shfuqizohet masa që dëmtoi industrinë minerare, Lidhja e Bizneseve të Kosovës del me njoftim

Lidhja e Bizneseve të Kosovës e ka mirëpritur vendimin e Ministrisë së Mjedisit, Planifikimit Hapësinor dhe Infrastrukturës për shfuqizimin e vendimit të mëparshëm Nr. 3143-5/21, i cili kishte shkaktuar pasoja serioze për sektorin e nxjerrjes dhe përpunimit të gurit në vend.

Reagimi i plotë:

Vendimi i shumëpritur vjen pas kërkesave të Lidhjes së Bizneseve të Kosovës – shfuqizohet masa që dëmtoi industrinë minerare dhe gurthyesit

Shoqata e Gurthyesve të Kosovës, që vepron në kuadër të Lidhjes së Bizneseve të Kosovës (LBK), mirëpret me vlerësim të lartë vendimin e Ministrisë së Mjedisit, Planifikimit Hapësinor dhe Infrastrukturës për shfuqizimin e vendimit të mëparshëm Nr. 3143-5/21, i cili kishte shkaktuar pasoja serioze për sektorin e nxjerrjes dhe përpunimit të gurit në vend.

Ky është një hap i madh drejt normalizimit të kushteve të punës për operatorët vendorë, si dhe një fitore për ekonominë e vendit, pas më shumë se dy vitesh kufizimesh të padrejta që:

• Penguan veprimtarinë e kompanive të licencuara,

• Shtynë shumë ndërmarrje drejt falimentimit,

• Dëmtuan industrinë ndërtimore dhe nxjerrëse,

• Rritën importet nga Serbia dhe dobësuan prodhuesit vendas.

Ky vendim është rezultat i angazhimit të vazhdueshëm të Lidhjes së Bizneseve të Kosovës dhe Shoqatës së Gurthyesve, të cilat kanë kërkuar me ngulm krijimin e kushteve të barabarta për bizneset vendore dhe zhvillimin e qëndrueshëm të industrisë minerare.

Në ditët në vijim, Shoqata e Gurthyesve të Kosovës me LBK do të zhvillojë takime me Bordin e Komisionit të Pavarur për Miniera dhe Minerale (KPMM) dhe me Agjencionin e Pylltarisë së Kosovës, për të adresuar pengesat e mbetura që vështirësojnë të bërit biznes në këtë sektor strategjik për ekonominë e Kosovës.

Shoqata e Gurthyesve të Kosovës,

në kuadër të Lidhjes së Bizneseve të Kosovës