Kandidati për kryetar të Lipjanit, Shukri Buja, njoftoi se kafen e mëngjesit e piu me Safet Krivaçën, shkruan Gazeta Demos.
Përmes një shkrimi në Facebook, Buja ka thurur lavde për karrierën dhe veprat e Safetit duke theksuar se për të është një kënaqësi e veçantë që ai të jetë pjesë e kontributit për ndryshimin në Lipjan.
Postimi i plotë i tij:
Kafen e mëngjesit me Safet Krivaçën
Safet Krivaça është nga Gadimja. Ka studiuar në Fakultetin Filozofik të Universitetit të Prishtinës, në Degën Letërsi dhe Gjuhë Shqipe.
Krahas studimeve ka punuar si gazetar në gazetën e studentëve Bota e Re. Ka punuar dhe shkruar në shumë media: redaktor dhe kryeredaktor përgjegjës në gazetën Fjala Jonë, gazetar shumëvjeçar në gazetat Koha Ditore dhe Kosova Sot, si dhe në revistën Kosovarja.
Ka shkruar edhe në shumë gazeta në Shqipëri dhe ka punuar në programe dokumentare me televizionet më të njohura evropiane për krimet serbe në Kosovë. Njihet për reportazhe dhe shkrime dokumentare nga lufta. Aktualisht është kryeredaktor në portalin Telegram News.
Krahas gazetarisë është marrë edhe me prozë e poezi. Ka botuar librat Ferri drejt varrezës masive dhe Ura e lotëve. Përmbledhja me poezi Natë për vetëvrasje është libri i tij i tretë, të cilin pata kënaqësinë ta marr sot si dhuratë nga vetë autori.
Është një kënaqësi e veçantë që pjesë e kontributit për ndryshimin në Lipjan do të jetë edhe Safeti.
Faleminderit, Safet!
