“S’je burrë”, Lushtaku i reagon Sveçlës: Si dezertori i luftës që je, nuk mund të flasësh për burrëri

Kryetari i komunës së Skenderajt, Sami Lushtaku i ka reaguar ministrit në detyrë të Punëve të Brendshme, Xhelal Sveçla, i cili dje i tha se “uk është burrë”, pasi sipas tij, Lushtaku në polici nuk e ka pranuar fajin lidhur me përleshjen ndaj zëvendësministrit në detyrë të Financave, Hysni Mehanit.

Lushtaku tha se nuk ia njeh të drejtën e cilësimit të burrërisë Sveçlës, pasi i njëjti sipas tij është dezertor i luftës.

“Xhelal xhandari, si dezertori i luftës që je, nuk mund të flasësh për burrëri. Ka qenë koha për secilin prej nesh për të treguar burrëri gjatë asaj periudhe. Fatkeqësisht, ti zgjodhe të ikësh!”, tha Lushtaku.

Ndër tjera, njëjti e akuzoi Sveçlën se e ka keqpërdorur Policinë e Kosovës.

“Si ministër qe je, e ke keqpërdorur policinë e Kosovës dhe njësinë speciale të saj përmes urdhrave politik nga shefi yt për shtetrrethimin e Skenderajt mbrëmjen e 14 majit.

Xhelal, kanë ikur ata që kanë bërë shtetrrethime në Kosovë e shpejt do të ikësh edhe ti!”, tha Lushtaku.