SPAK i komunikon sot zyrtarisht akuzat Erion Veliajt

Prokuroria e Posaçme kundër Korrupsionit dhe Krimit të Organizuar (SPAK) pritet që këtë të mërkurë t’i komunikojë zyrtarisht akuzat e ngritura ndaj kryetarit të Bashkisë së Tiranës, Erion Veliaj, dhe bashkëshortes së tij, Ajola Xoxa.

Të dy pritet të merren zyrtarisht të pandehur në lidhje me një sërë veprash penale që lidhen me hetimet e nisura nga SPAK.

Veliaj ndodhet në paraburgim që prej datës 10 shkurt dhe ndaj tij rëndojnë akuzat për korrupsion, fshehje të pasurisë dhe pastrim parash.

Sipas SPAK, ai dyshohet se në bashkëpunim me bashkëshorten dhe disa biznesmenë, ka përfituar fonde publike përmes faturave fiktive të lëshuara nga organizata të drejtuara nga Ajola Xoxa.