Pas ndërprerjes së seancës së 41-të konstituive, deputetët e PDK-së, LDK-së dhe AAK-së kanë qëndruar në sallën e Kuvendit, duke kërkuar urgjentisht konstituimin e Kuvendit të Kosovës.
Deputeti i PDK-së, Abelard Tahiri, ka theksuar se vendi ka nevojë sa më parë për konstituimin e Kuvendit dhe Qeverisë, duke shtuar se situata aktuale është e papranueshme për qytetarët e Kosovës.
Tahiri ka shprehur shqetësimin e tij për sektorin e energjisë, duke theksuar se tani më shumë se kurrë, Kosova ka nevojë për një hetim të thellë.
“Energjia nuk është lluks. Energjia është nevojë për secilin qytetar. Sot kostoja e energjisë po bëhet e papërballueshme. Në situatën në të cilën po jetojmë, qytetarët e kanë vetëm një rrugëdalje, vetëm largimin nga Kosova. A mund ta lejojmë këtë?” ka deklaruar ai, duke theksuar urgjencën e kërkesës për veprim.
