Kryetari i Skenderajt, Sami Lushtaku ka reaguar pas tragjedisë në Shëngjinë, ku dyshohet se si pasojë e dallgëve, dy persona nga Kosova, Leonit Aliu dhe Jetmir Binaku humbën jetë.
Lushtaku në telegrafimin e tij shprehu ngushëllime për familjet e viktimave, teksa bëri të ditur se Leoniti kishte prejardhje nga Rezalla e Skenderajt.
“Me dhimbje të thellë mora lajmin për humbjen tragjike të jetës së të riut Leonit Aliu nga Rezalla e Skenderajt, i cili humbi jetën tragjikisht në Shëngjin të Shqipërisë. Në këto çaste të rënda, shpreh ngushëllimet më të sinqerta për familjen Aliu, të afërmit dhe gjithë miqtë e tyre. Qoftë i përjetshëm kujtimi për Leonitin.
Po ashtu, ngushëllimet më të sinqerta i shpreh edhe familjes Binaku nga Gllobari i Drenasit, për humbjen e birit të tyre Jetmirit, në këtë tragjedi të rëndë që na ka prekur të gjithëve. Dhimbja juaj është dhimbje e të gjithë neve. Zoti u dhashtë forcë familjeve Aliu dhe Binaku për ta përballuar këtë humbje të madhe!”, tha Lushtaku.
