Një pacient 29-vjeçar ka vdekur sot në orët e mëngjesit në oborrin e Spitalit Rajonal të Prizrenit.
Lajmin e ka konfirmuar zëdhënësi i Policisë për Rajonin e Prizrenit, Shaqir Bytyqi, i cili tha se vdekja ka ndodhur pas përkeqësimit të gjendjes shëndetësore të viktimës, derisa ndodhej në oborrin e spitalit.
“Sipas informacioneve fillestare, gjendja shëndetësore e personit është përkeqësuar derisa ndodhej në oborrin e Spitalit dhe, përkundër përpjekjeve për ndihmë mjekësore, ai ka ndërruar jetë”, deklaroi Bytyqi.
Sipas tij, viktima, me inicialet L.K., 29 vjeç nga Prizreni, ishte duke u trajtuar në këtë institucion shëndetësor që nga data 23 korrik 2025. Ngjarja tragjike u raportua në orën 08:45 të mëngjesit të sotëm, më 24 korrik 2025.
“Njësitet relevante të Policisë kanë dalë në vendin e ngjarjes menjëherë pas marrjes së informatës. Pas përfundimit të ekzaminimeve në vendin e ngjarjes, me urdhër të prokurorit, trupi i pajetë është dërguar në Institutin e Mjekësisë Ligjore për obduksion”, shtoi Bytyqi.
Policia ka nisur hetimet për këtë rast, i cili për momentin është cilësuar si “Hetim i vdekjes”.
