Vetura “Audi” përfundon në lum, humbin jetën tre adolshentë

Tre adoleshentë, dy djem dhe një vajzë, kanë humbur jetën tragjikisht pasi një veturë “Audi” përfundoi në lumin Wear në Sunderland të Anglisë.

Policia e Northumbria-s njoftoi se aksidenti ndodhi rreth orës 13:30, pranë urës Wearmouth. Sipas autoriteteve, në veturë ndodheshin katër persona, ndërsa një 17-vjeçar arriti të dalë nga uji. Ai është dërguar në spital me lëndime jo serioze dhe më pas është arrestuar në lidhje me incidentin.

Hetimet për zbardhjen e rrethanave të aksidentit janë ende në fazat e para. Policia u ka bërë thirrje qytetarëve të shmangin zonën dhe të mos publikojnë apo transmetojnë pamje nga vendi i ngjarjes, shkruan Daily Star.

Autoritetet u kanë kërkuar gjithashtu personave që kanë informacione, veçanërisht atyre me pamje nga kamerat e sigurisë ose kamerat e veturave, që t’ua dorëzojnë ato policisë.