Zjarri në SHBA u mori jetën tre fëmijëve shqiptarë, flet daja: S’i pashë kur erdhën në jetë, tani do t’i përcjell në varr

Familja shqiptare Manati, me prejardhje nga Lushnja, është përballur me një tragjedi në Jacksonville të Floridës. Tre fëmijë humbën jetën mëngjesin e 26 gushtit, pasi shtëpia ku banonin u përfshi nga zjarri.

Mes viktimave janë dy binjakë të moshës 11-vjeç dhe një fëmijë 2-vjeçar. Nga flakët mundën të shpëtonin prindërit dhe dy fëmijët e tjerë të familjes, një foshnjë 2-muajshe dhe një 9-vjeçar, të cilët u transportuan në spital në gjendje kritike.

Daja i fëmijëve tha se njoftimin për ngjarjen e rëndë e mori nga xhaxhai i tij i vogël.

Gjatë një interviste në emisionin “Me Zemër të Hapur”, ai foli për dhimbjen pas lajmit tragjik, si edhe për faktin se emigrimi e kishte penguar t’i shihte nipërit prej vitesh.

Ai tregoi se po pret të udhëtojë drejt SHBA-së, ndërsa theksoi se nipërit arritën moshën 11-vjeç pa i parë as në momentin kur lindën, për shkak të ndarjes nga emigrimi. Tashmë, siç u shpreh ai, po shkon për t’i futur në dhe.

Sipas rrëfimit të dajës, dyshimet janë se flakët mund të jenë shkaktuar nga një lodër e blerë për fëmijët, e cila ishte lënë gjatë natës në karikim.

Ai deklaroi se bateria e lodrës shpërtheu, teksa po karikohej gjatë natës dhe se prej saj ndodhi gjithçka.

Daja bëri të ditur gjithashtu se nuk ka arritur ende të komunikojë me motrën e tij, nënën e fëmijëve, për shkak të gjendjes së rënduar psikologjike në të cilën ajo ndodhet pas tragjedisë.

Sipas tij, si motra ashtu edhe fëmijët janë të traumatizuar. Ai shtoi se ajo nuk e përballon dot ardhjen e natës dhe momentin kur bie errësira.