Mungesa e këngëtarit të ndjerë Shpat Kasapi vazhdon të ndihet thellë nga familja, miqtë dhe admiruesit e muzikës së tij. Edhe pas muajsh nga ndarja e tij nga jeta, emri dhe krijimtaria e artistit mbeten të gjalla në kujtesën e publikut.
Një postim i fundit i bashkëshortes së tij, Selvija Kasapi, ka emocionuar ndjekësit në rrjetet sociale. Ajo ka bërë të ditur se këngëtari kishte lënë pas disa projekte muzikore të papublikuara, të cilat tani do të shohin dritën e publikimit si një homazh për jetën dhe veprën e tij.
Mes emocioneve dhe mallëngjimit, Selvija njoftoi publikimin e këngës së re “NANA”, një këngë që trajton mallin e emigrantit për nënën dhe vendlindjen. Në fjalët e saj, ajo tregoi se kjo këngë merr një kuptim edhe më të dhimbshëm pas humbjes së Shpatit.
“Ah Shpat… Të qanë të gjitha nënat shqiptare, dhe sot po i lë botës një këngë që flet për mallin e një djali në gurbet, që ëndërron ditën kur do të kthehet e do ta gjejë nënën duke e pritur”, shkroi ajo.