Meriton Mjekiqi zbulon të vërtetën e arrestimit: Ishte një keqkuptim, nuk kam qenë në burg e as në arrati

Moderatori i njohur dhe ish-finalisti i Big Brother Vip 3 , Meriton Mjekiqi, ka reaguar publikisht ndaj lajmeve që qarkulluan ditëve të fundit, ku pretendohej se ai dhe i vëllai ishin arrestuar pas një zënke të rëndë. I ftuar në emisionin “Goca dhe Gra”, ai sqaroi me tone të qarta se gjithçka ishte e sajuar dhe larg të vërtetës.

“Dallimi mes së vërtetës dhe asaj që lexohet është shumë i madh”, – tha ai. “As jam arrestuar, as kam qenë në burg, as në arrati. Ka qenë një keqkuptim i plotë. Portalet abuzojnë sidomos me personazhet e showbizit”.

Meritoni u shpreh se nuk është hera e parë që emri i tij përdoret për klikime. Ai kujtoi një rast të vitit të kaluar, kur gjithashtu u publikuan lajme të rreme për një aksident që e shqetësuan familjen e tij.

“Zhurmat na bëjnë edhe mirë në aspektin e marketingut, por jo kur teprohet me akuza për arrestime”, shtoi moderatori. Ai tregoi se gjatë kohës që po qarkullonin lajmet, kishte parë një portal që raportonte për një “arrestim” të vitit 2019, të cilin e quajti trillim total.