Ricky Martin rikthehet në kinematografi pas më shumë se dy dekadash.
Këngëtari portorikan është bërë pjesë e kastit të filmit të ri të Gael García Bernal, “Hombre al Agua”, ku përveçse interpreton, shërben edhe si producent ekzekutiv.
Filmi pritet të ketë premierën botërore dhe atë në Amerikën e Veriut në Festivalet e Filmit në Venecia dhe Toronto, që zhvillohen muajin e ardhshëm. Sipas “Deadline”, Martin iu bashkua projektit pak para nisjes së xhirimeve në Meksikë.
“Hombre al Agua” përshkruhet si një komedi dramatike me elemente sureale dhe është filmi i tretë artistik i drejtuar nga Gael García Bernal, i cili gjithashtu luan rolin kryesor, ka bashkëshkruar skenarin dhe është përfshirë në prodhimin e filmit.
Bernal interpreton Camilon, një roje plazhi kubaneze, jeta e të cilit ndryshon kur shpëton nga mbytja në Karaibe Abelin, një biznesmen të fuqishëm meksikan me ambicie politike. Camilo e ndjek atë në Meksikë dhe bëhet krahu i tij i djathtë, ndërsa më pas martohet me vajzën e biznesmenit. Megjithatë, jeta e tij e re rezulton të jetë shumë më e rrezikshme nga sa kishte imagjinuar.
Ricky Martin shfaqet në rolin e Roby, një aktor i angazhuar për të interpretuar Camilon në një film biografik të prodhuar nga gruaja e tij.
Gael García Bernal ka treguar se Martin ishte zgjedhja e tij e parë për rolin, por për shkak të vështirësive për ta kontaktuar, e mbajti emrin e tij sekret gjatë pjesës më të madhe të përgatitjeve.
“Ricky ishte i pari që mendova për rolin, por më dukej si një ide aq e çmendur, pothuajse e pamundur”, tha Bernal.