Sunny Hill Festival rikthehet këtë verë me një edicion që pritet ta konfirmojë edhe një herë pozitën e tij si një nga festivalet më të rëndësishme muzikore në Evropën Juglindore.
Edicioni i sivjetmë do të mbahet nga 31 korriku deri më 2 gusht 2026 në Prishtinë dhe pritet të tërheqë adhurues të muzikës nga afro 60 shtete të botës.
Në krye të programit artistik do të jenë yjet ndërkombëtarë Katy Perry , Martin Garrix dhe Lewis Capaldi.
Artistë këta të cilëve do t’u bashkohen emra të njohur si EsDeeKid, Seth Troxler , PAWSA , Dhurata Dora , Adam Port & Rampa , Blanco , GJIN, Ledri Vula , MC Kresha , Manifest dhe Carlita , si dhe shumë artistë të tjerë ndërkombëtarë, rajonalë dhe vendorë.
I themeluar në vitin 2018 nga Dukagjin “Dugi” Lipa, Sunny Hill Festival promovohen në arenën ndërkombëtare nga fituesja e trefishtë e çmimit Grammy, Dua Lipa.
Gjatë viteve, festivali ka sjellë në Kosovë emra të mëdhenj të skenës botërore si Dua Lipa, Miley Cyrus, Calvin Harris, J Balvin, Shawn Mendes, Stormzy, Burna Boy, Bebe Rexha, DJ Snake, Black Coffee, Peggy Gou, Anyma dhe Hardwell. “Sunny Hill ka qenë gjithmonë më shumë sesa një festival muzikor.
”Për disa ditë çdo verë, ne e sjellim botën në Kosovë dhe i gjithë vendi e ndien këtë energji. Vëmendja që festivali i sjell Kosovës është një promovim që asnjë fushatë turistike nuk mund ta blejë, ndërsa vlera që krijohet mbetet këtu – në ekonominë lokale, në sektorin e kulturës dhe në mundësitë për të rinjtë,” ka deklaruar themeluesi i festivalit, Dukagjin “Dugi” Lipa.