Atentati ndaj gjeneralit rus, Lavrov akuza Ukrainës: Po tentojnë të prishin bisedimet e paqes

Ministri i jashtëm rus, Sergey Lavrov ka reaguar pas atentatit ndaj gjeneral-lejtënantit të Ministrisë së Mbrojtjes Ruse, Vladimir Alexeyev, i cili u qëllua disa herë më armë.

Lavrov ka akuzuar Ukrainën për atentatin duke deklaruar se kërkojnë të prishin bisedimet e paqes.

“Ky akt terrorist konfirmoi edhe një herë angazhimin e regjimit të Zelensky-t ndaj provokimeve të vazhdueshme që synojnë prishjen e procesit negociues dhe gatishmërinë e tij për të bërë gjithçka që është e mundur për të bindur sponsorët e tij perëndimorë që të mos mbeten pas Shteteve të Bashkuara në përpjekjet për t’i larguar ata nga rruga drejt arritjes së një zgjidhjeje të drejtë” , deklaroi Lavrov.

Në të njëjtën kohë, Lavrov nuk pranoi të spekulonte se si incidenti mund të ndikonte në negociatat e ardhshme. “Ky nuk është funksioni im, kjo do të vendoset nga udhëheqja e vendit tonë”, tha ai.

Atentati ndaj Alexeyev ndodhi pak më parë, kur një person i armatosur i paidentifikuar qëlloi disa herë drejt gjeneralit në një ndërtesë banimi në autostradën Volokolamskoye dhe më pas u largua nga vendi i ngjarjes. Gjenerali u dërgua në spital, ndërsa nuk dihet ende gjendja e tij shëndetësore. Komiteti Hetues ka nisur një hetim penal me akuzat për tentativë vrasjeje dhe trafikim të paligjshëm të armëve të zjarrit.