“Erdha për ta rrëzuar Ramën”: Arrestohen dy kosovarë në Tiranë, njëri thotë në polici së është simpatizant i Kurtit

Dy shtetas nga Kosova, me inicialet D.B. dhe E.S., janë arrestuar nga Policia e Shqipërisë nën dyshimin për përfshirje në protestën e dhunshme të mbajtur në Tiranë.

Sipas dokumenteve të siguruara, njëri nga të arrestuarit ka deklaruar para oficerëve të Policisë Gjyqësore se kishte ardhur nga Prishtina për të protestuar kundër qeverisë së kryeministrit shqiptar, Edi Rama, dhe për të kërkuar vendosjen e një qeverie që mbështet politikat e Lëvizjes Vetëvendosje.

Në dëshminë e tij, ai ka thënë se punon si kamerier në Prishtinë dhe se kishte vendosur, së bashku me një shok, të udhëtonte drejt Shqipërisë për të marrë pjesë në protestë.

Ai ka deklaruar se është simpatizant i kryeministrit të Kosovës, Albin Kurti, duke vlerësuar se politikat e tij dallojnë nga ato të Ramës.

“Duke qenë se unë jam djalë veterani, vendosa së bashku me shokun tim të vij në Tiranë për ta rrëzuar qeverinë e kryeministrit Edi Rama”, thuhet në dëshminë e tij, sipas procesverbalit.

I pyetur për arsyet e pjesëmarrjes në protestë, ai ka pretenduar se synimi i tij ishte të protestonte në mënyrë paqësore dhe të kërkonte ndryshimin e sistemit politik në Shqipëri.

“Arsyeja pse unë mora pjesë është të bëj protestë paqësore për ndryshimin e këtij sistemi, pasi bie ndesh me politikat e Kosovës”, ka deklaruar ai.

Në dëshminë e tij, shtetasi nga Kosova ka shprehur pakënaqësi edhe për qëndrimin e Shqipërisë ndaj Kosovës, duke pretenduar se Tirana nuk po e mbështet sa duhet Kosovën.

Ai ka treguar se, gjatë kohës kur po lëvizte nëpër Tiranë dhe po u bashkohej protestuesve, ishte ulur në rrugë së bashku me shokun e tij, kur, sipas tij, disa persona që ishin prezantuar si policë i kishin marrë me automjet dhe i kishin dërguar në komisariat.

I pyetur nëse kishte kryer veprime të dhunshme gjatë protestës, ai e ka mohuar një gjë të tillë.

“Jo, s’kam bërë asnjë veprim të dhunshëm gjatë zhvillimit të protestës”, thuhet në dëshminë e tij.

Ai ka shpjeguar edhe arsyen pse e kishte mbuluar fytyrën gjatë protestës, duke thënë se e kishte bërë këtë për shkak të të ftohtit.

Dy shtetasit nga Kosova dyshohet se përfshihen në disa vepra penale, përfshirë goditjen për shkak të detyrës, prishjen e rendit dhe qetësisë publike, shkatërrimin e pronës dhe kundërshtimin e punonjësve të rendit publik.

Ndërkohë, drejtori i Departamentit për Rendin dhe Sigurinë Publike në Policinë e Shqipërisë, Dhimitraq Ziu, ka deklaruar se deri të premten në Tiranë janë arrestuar 127 persona, ndërsa 244 të tjerë janë proceduar në gjendje të lirë.