Familjarët kërkojnë me dëshpërim më të dashurit e tyre nën dritën e telefonave në Nepal

Ndërsa nata ka rënë në Nepal, të afërm të shumtë vazhdojnë kërkimet për informacion rreth njerëzve të tyre të dashur, duke kontrolluar listat e të mbijetuarve nën dritën e celularëve.

Operacionet e kërkim-shpëtimit dhe ndihmës kanë vijuar gjatë gjithë ditës, ndërsa situata mbetet e rëndë dhe numri i viktimave vazhdon të rritet, shkruan BBC

Në disa zona, policia është parë duke transportuar trupat e viktimave drejt një zone të caktuar për varrime masive, në një tjetër dëshmi të përmasave të tragjedisë.

Ndërkohë, banorë të shumtë janë rikthyer në shtëpitë e tyre për të parë nga afër dëmet e shkaktuara. Pamjet nga terreni tregojnë njerëz të dëshpëruar që përpiqen të gjejnë të afërmit e tyre dhe të kuptojnë përmasat e shkatërrimit.

Për shumë familje, pritja për një emër në listat e të mbijetuarve mbetet ende momenti më i vështirë, ndërsa ekipet e emergjencës vijojnë përpjekjet për të gjetur persona të tjerë të bllokuar ose të zhdukur.