Katari paralajmëron: Përshkallëzimi SHBA–Iran do të ishte katastrofik për rajonin

Një përshkallëzim ushtarak midis Shteteve të Bashkuara dhe Iranit do të kishte pasoja të rënda për rajonin, ka paralajmëruar Katari të martën, pas kërcënimeve të Uashingtonit për sulme në përgjigje të shtypjes qeveritare ndaj protestave në Republikën Islamike.

Zëdhënësi i Ministrisë së Punëve të Jashtme të Katarit, Majed al-Ansari, ka theksuar se çdo përshkallëzim do të sillte pasoja katastrofike për rajonin dhe më gjerë.

“Ne e dimë se çdo përshkallëzim… do të kishte rezultate katastrofike në rajon dhe më gjerë, dhe për këtë arsye duam ta shmangim këtë sa më shumë që të jetë e mundur”, ka thënë al-Ansari gjatë një konference për media në Doha.

Ky reagim vjen në kohën kur protestat masive në Iran, që kanë nisur që nga e enjtja, janë shndërruar në një nga sfidat më të mëdha për udhëheqjen klerike që nga Revolucioni Islamik i vitit 1979, i cili rrëzoi shahun.

Ndërkohë, Shtëpia e Bardhë ka përsëritur të hënën se presidenti i SHBA-së, Donald Trump, po shqyrton mundësinë e sulmeve ajrore ndaj Iranit për të ndalur shtypjen ndaj protestuesve.

Në të njëjtën kohë, grupet e të drejtave të njeriut kanë raportuar një numër në rritje të viktimave në Republikën Islamike, me informacione që vazhdojnë të vijnë nga Irani, pavarësisht ndërprerjes disa ditore të internetit.

Në përgjigje të kërcënimeve të përsëritura të Trumpit për ndërhyrje, kryetari i Parlamentit të Iranit, Mohammad Bagher Ghalibaf, ka deklaruar se Irani do të kundërpërgjigjej, duke i quajtur ushtrinë amerikane dhe dërgesat e saj në det “objektiva legjitime”, në komentet e transmetuara nga televizioni shtetëror.