Mbretëria e Bashkuar shënon rekord të ri të temperaturave për muajin qershor, arrin në 37.3°C

Një temperaturë paraprake prej 37.3°C është regjistruar në Santon Downham, në qarkun Suffolk, duke vendosur një rekord të ri për temperaturën më të lartë të regjistruar ndonjëherë në muajin qershor në Mbretërinë e Bashkuar, njoftoi Met Office, ndërsa paralajmërimet e rralla të nivelit të kuq mbeten në fuqi edhe të premten

Kjo temperaturë tejkalon rekordin paraprak prej 37.1°C, i regjistruar më herët gjatë ditës në Cavendish, po ashtu në Suffolk, raporton TheGuardian .

Me këto temperatura është thyer me më shumë se 1°C rekordi i mëparshëm i të nxehtit për muajin qershor, i cili daton nga vera e vitit 1976. Ky është një ndryshim i konsiderueshëm, pasi në të kaluarën rekordet zakonisht tejkaloheshin vetëm me disa të dhjetat e gradës.

Meteorologët parashikojnë që temperaturat të arrijnë deri në 36°C në Londër dhe 35°C në Mançester gjatë së premtes. Ndërkohë, në Belfast dhe Cardiff temperaturat maksimale pritet të arrijnë në 26°C.

“Kjo periudhë e jashtëzakonshme me mot të nxehtë dhe të lagësht do të vazhdojë të mbajë nën ndikim Mbretërinë e Bashkuar edhe për pak kohë”, tha një nga meteorologët kryesorë të Met Office, Andy Page.

“Megjithëse paralajmërimi aktual i kuq për zonat qendrore dhe perëndimore të Anglisë dhe Uellsit do të përfundojë më vonë gjatë ditës, vala e të nxehtit do të vazhdojë të sjellë temperatura të larta në këto rajone, ndonëse jo në nivelet kulmore të së mërkurës dhe të enjtes.

“Presim që temperaturat maksimale gjatë ditës të kalojnë 36°C, madje në disa zona mund të arrijnë edhe 37°C”, shtoi ai.

Shkencëtari kryesor i Met Office, profesori Stephen Belcher CBE, tha se vala e të nxehtit e kësaj jave përbën një ngjarje të rëndësishme meteorologjike, për të cilën është lëshuar një paralajmërim i kuq për nxehtësi ekstreme.

“Ndryshimet klimatike të shkaktuara nga aktiviteti njerëzor i kanë bërë ngjarje të tilla më të mundshme dhe më intensive.

“Të shohësh temperatura të tilla në Mbretërinë e Bashkuar në muajin qershor është shqetësuese. Ngjarje të tilla tregojnë qartë pasojat e ndryshimeve klimatike, pasi temperaturat shumë të larta dhe lagështia e madhe paraqesin rreziqe serioze për shëndetin për shkak të stresit nga nxehtësia, si dhe ndikojnë në sektorë të ndryshëm si transporti, energjia dhe furnizimi me ujë”, u shpreh ai.