Misteri i orëve të fundit të Epstein, dokument i ri ngre pikëpyetje për kohën e vdekjes së tij

Informacione të reja vazhdojnë të dalin në dritë për jetën dhe vdekjen e financierit amerikan Jeffrey Epstein, ndërsa një dokument i publikuar nga Departamenti Amerikan i Drejtësisë ka ngritur pikëpyetje për kronologjinë zyrtare të momenteve të fundit të tij.

Një njoftim federal, i datës 9 gusht 2019, raporton se Epstein ishte gjetur pa ndjenja dhe i shpallur i vdekur, një ditë përpara se autoritetet të njoftonin zyrtarisht se trupi i tij ishte zbuluar në qelinë e tij në Qendrën Federale të Paraburgimit në Manhattan më 10 gusht 2019.

Sipas të dhënave zyrtare të burgut, Epstein, 66 vjeç, u gjet pa ndjenja rreth orës 6:30 të mëngjesit nga një oficer, ndërsa personeli mjekësor tentoi ta ringjallte, por ai u shpall i vdekur pak më vonë. Mjeku ligjor e klasifikoi vdekjen si vetëvrasje me varje.

Autoritetet kanë pranuar se ka pasur dështime serioze sigurie, rojet nuk kryen kontrollet e detyrueshme gjatë natës, ndërsa kamerat e sigurisë pranë qelisë nuk funksiononin. Për këtë arsye, koha e saktë e vdekjes nuk është përcaktuar kurrë zyrtarisht.

Dokumentet e reja përfshijnë edhe pamje të paqarta të një figure të paidentifikuar që lëvizte pranë katit ku mbahej Epstein, por hetuesit nuk arritën të konfirmojnë ndonjë lidhje të drejtpërdrejtë me vdekjen e tij.

Epstein ishte arrestuar më 6 korrik 2019 dhe përballej me akuza federale për trafikim seksual të të miturve dhe komplot, duke pritur gjyqin, kur u gjet i vdekur. Çështja e tij mbetet një nga skandalet më të mëdha penale dhe politike në SHBA, me hetime që vazhdojnë edhe sot.