Një raport i organizatës Human Rights Watch (HRW) denoncon se vrasjet e palestinezëve nga forcat izraelite, ndërsa ata përpiqen të sigurojnë ushqim, përbëjnë krime lufte. Sipas raportit, situata katastrofale humanitare në Gaza është pasojë direkte e përdorimit nga Izraeli të urisë si armë lufte një krim lufte si dhe bllokimit të qëllimshëm dhe të vazhdueshëm të ndihmave humanitare dhe shërbimeve bazë.
Forcat izraelite kanë krijuar në Gaza një sistem shpërndarjeje ndihmash që HRW e cilëson si “të dështuar dhe ushtarak”, duke kthyer këtë operacion humanitar në “pishina të vërteta gjaku” dhe një “kurth vdekjeprurës”, theksohet në raportin e publikuar të premten.
Pas 22 muajsh luftë shkatërruese, e cila nisi më 7 tetor 2023 me sulmin e Hamasit ndaj Izraelit, Gaza rrezikon një “uri të përgjithshme”, sipas OKB-së, dhe është plotësisht e varur nga ndihmat humanitare që shpërndahen me kamionë ose hidhen nga ajri. Izraeli e ka lehtësuar pjesërisht bllokadën totale të vendosur në mars ndaj enklavës palestineze, e cila ka shkaktuar mungesa të thella ushqimi, barnash dhe mallrash të tjera jetike.
“Incidente që kanë shkaktuar viktima të shumta ndodhin thuajse çdo ditë në katër vendet e shpërndarjes së ndihmave që menaxhohen në territorin palestinez nga Fondacioni Humanitar për Gazën (GHF)”, një organizatë e mbështetur nga Izraeli dhe SHBA-ja, me të cilën organizatat ndërkombëtare refuzojnë të bashkëpunojnë. Sipas OKB-së, të paktën 859 palestinezë janë vrarë duke u përpjekur të marrin ushqim në këto pika midis 27 majit dhe 31 korrikut, shumica nga forcat izraelite.
“Jo vetëm që forcat izraelite e lënë me qëllim pa ushqim popullsinë civile palestineze në Gaza, por ato gjuajnë pothuajse çdo ditë ndaj atyre që përpiqen me dëshpërim të sigurojnë ushqim për familjet e tyre”, deklaron Belkis Wille, zëvendësdrejtore e divizionit për Kriza dhe Konflikte në HRW, e cituar në raport. Ajo shton se “forcat izraelite, me mbështetjen e SHBA-së dhe kompanive private, kanë krijuar një sistem shpërndarjeje ndihmash humanitare të dështuar dhe ushtarak, që ka kthyer operacionet e ndihmave në pishina gjaku”.
Raporti i HRW kërkon ndërprerjen e menjëhershme të këtij sistemi, që përshkruhet si një “kurth vdekjeprurës” i mbështetur nga SHBA-të.
