Shefi i UNRWA-së: Ka shpresë për t’i lejuar OKB-së, të adresojë urinë dhe vuajtjet e mbi 2 milion njerëzve

Philippe Lazzarini, kreu i agjencisë palestineze të refugjatëve të OKB-së, UNRWA, ka folur mbi situatën në zhvillim e sipër në lidhje me planin e paqes të Donald Trump.

Në një deklaratë të postuar në X, ai shkruan se tani ekziston një “moment i mirëpritur dhe i rrallë për të arritur një armëpushim të përhershëm në Gaza dhe për të hapur rrugën për një zgjidhje afatgjatë për t’i dhënë fund konfliktit të gjatë me dekada”.

Ai shton se kjo është gjithashtu “një dritare e rrallë shprese për t’i lejuar OKB-së, përfshirë UNRWA-në, të adresojë urinë dhe vuajtjet e mbi 2 milion njerëzve me nevoja të papërshkrueshme”.

Por Lazzarini gjithashtu kërkon që “ata që janë përgjegjës për mizoritë e kryera” më 7 tetor dhe që nga ajo kohë duhet të ndiqen penalisht.

Në afat të shkurtër, të gjithë pengjet dhe të ndaluarit palestinezë duhet të lirohen, bombardimet duhet të ndalen dhe ndalimi ndaj UNRWA-s duhet të hiqet, shton ai.

Izraeli akuzon UNRWA-n për bashkëpunim me Hamasin dhe në fakt e shpalli të jashtëligjshme në janar, duke paralizuar operacionet e saj të ndihmës në Rripin e Gazës.