Shkarkohet kryeprokurori i GjPN-së, akuzohet për marrëdhënie seksuale me punonjëse

Anëtarët e Gjykatës Penale Ndërkombëtare kanë votuar për shkarkimin e Karim Khan nga posti i kryeprokurorit për shkak të akuzave për sjellje të papërshtatshme seksuale, shkruan BBC-ja.

Khan, i zgjedhur si prokurori i tretë i GjPN-së në vitin 2021, ishte pezulluar muajin e kaluar, dhe vendimi për largimin e tij u miratua me 82 vota pro.

Organi mbikëqyrës i gjykatës arriti në përfundimin se ai kishte kryer një shkelje të rëndë të detyrës dhe sjellje të rëndë të papërshtatshme, duke pasur një marrëdhënie seksuale të papërshtatshme me një punonjëse më të re të GjPN-së dhe duke u përpjekur ta pengonte atë që të vazhdonte ankesën e saj.

Ai i ka mohuar vazhdimisht të gjitha akuzat, dhe avokatët e tij e kanë cilësuar suspendimin e tij si “të paligjshëm, proceduralisht të padrejtë dhe të pambështetur në prova.”

Khan, një jurist i njohur britanik, ndodhet në pushim vullnetar që nga maji i vitit 2025 për t’u mbrojtur nga akuzat. Atij i është pezulluar gjithashtu përkohësisht e drejta për të ushtruar profesionin e avokatit në Mbretërinë e Bashkuar, përderisa po zhvillohet një hetim nga autoriteti përkatës.