Thuhet se Trumpi i ka dhënë Maduros ultimatum për ta dorëzuar pushtetin në Venezuelë

Presidenti i Shteteve të Bashkuara, Donald Trump, thuhet se gjatë një bisede telefonike i ka dhënë një ultimatum homologut venezuelas, Nicolas Maduro, që ta dorëzojë pushtetin menjëherë, por presidenti autoritar e ka refuzuar kërkesën, duke kërkuar “amnisti globale” për veten dhe aleatët.

Të dielën, kreu i Shtëpisë së Bardhë konfirmoi se telefonata mes tij dhe Maduros kishte ndodhur, duke thënë para gazetarëve: “Nuk do të thosha se ka shkuar mirë apo keq, ishte telefonatë.”

As Shtetet e Bashkuara, as Qeveria e Venezuelës nuk kanë dhënë hollësi të mëtejme për temat e diskutuara gjatë bisedës shumë të pazakonshme, e cila mendohet se është zhvilluar më 21 nëntor, raporton gazeta “The Guardian”.

Megjithatë, burimet i thanë gazetës amerikane “Miami Herald” se Trumpi i kishte dërguar një “porosi të hapur” homologut nga Amerika e Jugut, i cili është në fokusin e një fushate 4-mujore të presionit në të cilën Trumpi ka urdhëruar dislokim masiv të forcave detare në Karaibe, në veri të bregdetit të Venezuelës.

“Mund ta shpëtosh veten dhe ata që janë më të afërtit ndaj teje, por duhet të largohesh nga vendi tani” – raportohet t’i ketë thënë Trumpi Maduros, duke i ofruar largim të sigurt nga Venezuela atij, bashkëshortes dhe të birit “vetëm nëse ai pajtohet për të dhënë dorëheqje menjëherë”.