Trump deklaron se do t’u thotë udhëheqësve ushtarakë amerikanë se i duan ata

Presidenti Donald Trump tha të dielën se do t’u thoshte në një takim gjeneralëve dhe admiralëve amerikanë në Quantico të Virxhinias se ata ishin udhëheqës të çmuar që duhej të ishin të fortë dhe të ashpër.

Sekretari i Mbrojtjes Pete Hegseth thirri udhëheqës të lartë ushtarakë amerikanë nga e gjithë bota për një takim në Quantico të martën – një takim i rrallë i udhëheqjes ushtarake të vendit.

“Dua t’u them gjeneralëve se i duam, se janë udhëheqës të çmuar, se duhet të jenë të fortë, të ashpër, të zgjuar dhe të dhembshur”, tha Trump për Reuters në një intervistë.

“Kjo është e gjitha, shpirti i trupave. Është koha që dikush ta bëjë këtë,” shtoi ai.

SHBA-të kanë trupa në të gjithë botën, duke përfshirë vende të largëta si Koreja e Jugut, Japonia dhe në të gjithë Lindjen e Mesme, të cilat komandohen nga gjeneralë dhe admiralë me dy, tre dhe katër yje.

Në pothuajse çdo fjalim publik që mban, Hegseth flet për “etosin e luftëtarit” dhe nevojën që ushtria amerikane të ketë një mentalitet luftëtari.

Më parë këtë muaj, Trump nënshkroi një urdhër ekzekutiv për të riemëruar Departamentin e Mbrojtjes si “Departamenti i Luftës”, duke u rikthyer në një titull që e mbajti deri pas Luftës së Dytë Botërore, kur zyrtarët kërkuan të theksonin rolin e Pentagonit në parandalimin e konfliktit.