Zhvillime të reja: SHBA po dërgon avionë luftarakë në Lindjen e Mesme

Ushtria amerikane raportohet se po dislokon më shumë aeroplanë luftarakë në Lindjen e Mesme dhe po zgjat qëndrimin e disa avionëve të tjerë luftarakë, duke forcuar kështu praninë ushtarake të SHBA-së në rajon, ndërsa lufta mes Izraelit dhe Iranit vazhdon, thanë tre zyrtarë amerikanë.

Njëri nga zyrtarët tha se dislokimet përfshijnë avionë luftarakë F-16, F-22 dhe F-35, raporton Reuters.

Dy nga zyrtarët theksuan se dislokimi i avionëve luftarakë ka një karakter mbrojtës dhe se ata janë përdorur për të rrëzuar dronë dhe raketa.

Ndërkohë, pak më herët u raportua se Irani ka lëshuar raketa drejt Izraelit.

Forcat e Mbrojtjes së Izraelit (IDF) kanë bërë të ditur se kanë identifikuar raketa të lëshuara drejt Izraelit këtë mbrëmje, sipas orës lokale.

“Pak më parë, IDF identifikoi raketa të lëshuara nga Irani drejt territorit të Shtetit të Izraelit. Sistemet mbrojtëse janë duke u aktivizuar për të përgjuar kërcënimin,” – shkroi IDF.

Paralajmërime paraprake u dhanë banorëve pranë Detit të Vdekur dhe në jug të vendit që mund të kenë nevojë të strehohen. Sipas IDF-së, sirenat u aktivizuan gjithashtu në jug të Izraelit.