Atmosfera u tensionua në konferencën për shtyp pas ndeshjes, ku presidenti i Napolit, Aurelio De Laurentiis, dhe trajneri Antonio Conte u përfshinë në një debat të hapur lidhur me garën për titull dhe meritat e Interit.
Gjithçka nisi kur De Laurentiis deklaroi se Napoli do ta kishte fituar kampionatin me lehtësi nëse nuk do të ishte përballur me problemet e shumta me lëndimet. Megjithatë, Conte e kundërshtoi menjëherë këtë pretendim.
“Absolutisht jo”, u përgjigj trajneri italian, duke theksuar se Interi meriton plotësisht suksesin e arritur. Sipas tij, zikaltërit kanë dëshmuar vazhdimisht cilësinë e tyre, duke kujtuar se sezonin e kaluar arritën në finalen e Ligës së Kampionëve dhe këtë edicion e kanë forcuar edhe më shumë skuadrën.
Debati u ashpërsua kur De Laurentiis argumentoi se Interi kishte bërë paraqitje më të dobëta në Evropë krahasuar me sezonin e kaluar, por Conte nuk u tërhoq nga qëndrimi i tij.