“Fadil Vokrri”, gati për ndeshjen Kosovë-Izrael

Stadiumi kryesor i vendit, “Fadil Vokrri” në Prishtinë, ka përfunduar me sukses të gjitha procedurat e rikuperimit të fushës dhe tashmë është plotësisht i gatshëm për të mirëpritur sërish përballjet ndërkombëtare.

Lajmi i mirë për tifozët dardanë vjen pikërisht para sfidës së radhës të Përfaqësueses së Kosovës në shtëpi, ku më 14 nëntor Kosova do të përballet me Kombëtaren e Izraelit, në kuadër të ndeshjeve të Ligës së Kombeve.

Kjo përballje e rëndësishme do të zhvillohet me fillim nga ora 15:00 dhe shënon ndeshjen e fundit që Kosova do të luajë si vendase për këtë vit.

Menjëherë pas këtij takimi në Prishtinë, djelmoshat e udhëhequr nga përzgjedhësi Franco Foda do të marrin rrugën drejt Dublinit, ku i pret sfida e radhës si mysafirë kundër Irlandës.