FIFA heq dorë nga plani i diskutueshëm i investimeve për Kupën e Botës

FIFA ka bërë një hap prapa lidhur me projektin ambicioz “FIFA Forward Enterprise” (FFE), por ende nuk e ka tërhequr zyrtarisht planin. Institucioni më i lartë i futbollit botëror ka zbutur qëndrimin, duke bërë të ditur se iniciativa nuk do të zbatohet pa miratimin e federatave anëtare.

Debati nisi më 28 korrik, kur u raportua se FIFA po shqyrtonte krijimin e “FIFA Forward Enterprise”, një subjekt komercial me vlerë të parashikuar rreth 20 miliardë dollarë.

Projekti parashihte që investitorë privatë, përfshirë edhe firmën e Joshua Kushner, vëllait të Jared Kushner, të blinin një paketë minoritare prej 20-21 për qind të të drejtave tregtare të Kupës së Botës dhe Kupës së Botës për Klubeve.

Plani shkaktoi reagime të shumta në botën e futbollit. UEFA ishte konfederata që kundërshtoi më fuqishëm këtë ide, ndërsa të 55 federatat anëtare të saj vendosën më 30 korrik një bojkot të pacaktuar ndaj të gjitha garave të FIFA-s.

Mes federatave që mbështetën këtë qëndrim janë edhe Spanja dhe Portugalia, dy prej vendeve organizatore të Kupës së Botës 2030.

Shqetësime për projektin shprehën edhe konfederatat CONCACAF dhe AFC (Azi), të cilat kritikuan mungesën e konsultimeve dhe afatin e shkurtër deri më 19 shtator për marrjen e një vendimi për një çështje të tillë madhore.

Presioni ndaj FIFA-s u shtua edhe pas dorëheqjes së Carlos Cordeiro, një prej këshilltarëve më të afërt të presidentit Gianni Infantino, i cili u largua në shenjë proteste ndaj kësaj iniciative.

Më 31 korrik, FIFA publikoi një deklaratë zyrtare ku sqaroi se aktivitetet e saj tregtare do të mbeten të pandryshuara dhe se “FIFA Forward Enterprise” nuk do të krijohet pa miratimin e të gjitha 211 federatave anëtare.

Në deklaratë, FIFA theksoi se “askush nuk po shet futbollin”, duke kundërshtuar raportimet që, sipas saj, kishin paraqitur në mënyrë të pasaktë projektin.

Megjithatë, kjo shihet si një tërheqje e pjesshme e FIFA-s përballë presionit nga federatat dhe konfederatat, por jo si braktisje përfundimtare e planit. Konsultimet do të vazhdojnë, ndërsa vendimi përfundimtar pritet të merret në votimin e planifikuar për muajin shtator.