Guti e paralajmëron Barcelonën para El Clásicos: Nuk do ta shkatërrojë Real Madridin!

Ish-futbollisti i Real Madridit, Guti, e ka komentuar El Clásicon e parë të sezonit, duke e vlerësuar formën e Barcelonës, por edhe duke i paralajmëruar katalunasit se përballja me rivalin e përjetshëm do të jetë një test i vërtetë.

“Sigurisht, Barcelona nuk do ta shkatërrojë Real Madridin në El Clásico. Barça ende nuk është përballur me një skuadër të fortë dhe i mungon ende Liga e Kampionëve. Do të shohim nëse do të jetë në gjendje të luftojë për ta fituar atë”, deklaroi Guti, në komentet e transmetuara nga emisioni “El Chiringuito”.

Ish-mesfushori madrilen e pranoi se Barcelona po e kalon një periudhë shumë të mirë, duke e theksuar qetësinë që skuadra katalunase e shfaq në lojën e saj.

“Deri më tani këtë sezon, nuk ka pasur asnjë skuadër që ka qenë në gjendje t’i bëjë ballë ritmit të Barcelonës. Është një skuadër e madhe dhe shfaq një qetësi që Real Madridit për momentin i mungon”, u shpreh ai.

Megjithatë, Guti beson se El Clásico do të jetë një provë krejtësisht tjetër për Barcelonën, e cila duhet ta dëshmojë se mund ta ruajë nivelin edhe përballë kundërshtarëve më të fortë.

Ndeshja mes Barcelonës dhe Real Madridit pritet të zhvillohet më 25 tetor, në kuadër të sezonit 2026/27 të La Ligës.

Përballja në “Spotify Camp Nou” do të jetë një nga momentet më të rëndësishme të fillimit të kampionatit spanjoll.