Viktor Gyökeres po mendon seriozisht largimin nga Arsenali gjatë afatit kalimtar të janarit.
Sipas TEAMtalk, sulmuesi suedez është i pakënaqur me minutazhin e kufizuar nën drejtimin e Mikel Artetës, pasi ende nuk e ka nisur asnjë ndeshje të Premierligës nga minuta e parë këtë sezon.
Një tjetër arsye për shqetësimin e tij është interesimi i vazhdueshëm i Arsenalit për sulmuesin e Atletico Madridit, Julián Álvarez, transferimi i të cilit mund t’ia vështirësojë edhe më shumë hapësirën në skuadër.
Atletico Madridi është ndër klubet e interesuara për Gyökeresin, ndërsa sulmuesi suedez po vlerëson edhe mundësi të tjera në Angli, Itali dhe Gjermani. Sipas raportimit, Arsenali mund të jetë i gatshëm ta lejojë largimin e tij nëse vjen një ofertë e përshtatshme.
Gyökeres iu bashkua Arsenalit nga Sportingu në vitin 2025 dhe shënoi 21 gola në sezonin e tij të parë me klubin londinez. Megjithatë, mungesa e minutave këtë edicion ka bërë që e ardhmja e tij në Emirates të vihet në pikëpyetje.
Mbetet të shihet nëse sulmuesi 28-vjeçar do të largohet në janar dhe nëse Atletico Madridi do të bëjë një lëvizje konkrete për transferimin e tij.
