Ish-lojtari tregon se me sa para gjobiten lojtarët e Premierligës, pas kartonëve të verdhë

Ben Foster ka zbuluar se sa gjobiten lojtarët e Premierligës kur ndëshkohen me karton të verdhë gjatë një ndeshjeje.

Ish-portieri i Manchester Unitedit ka zbuluar disa detaje pak të njohura nga jeta e futbollistëve në Premierligë, duke shpjeguar se lojtarët gjobiten me të njëjtën shumë prej 10 funtesh për një karton të verdhë, pavarësisht nivelit në të cilin luajnë.

Rregullat përcaktohen në manualin e Federatës Angleze të Futbollit (FA) dhe vlejnë në çdo nivel të lojës, nga futbolli amator deri te ndeshjet më të mëdha të Premierligës. Kjo do të thotë se një lojtar që ndëshkohet me karton të verdhë në një ndeshje të ligave amatore të së dielës përballet me të njëjtën gjobë financiare si një yll milioner i elitës së futbollit anglez, pavarësisht pagës që merr.

Kjo temë u diskutua në episodin e fundit të podkastit “Fozcast” të Fosterit, ku 43-vjeçari zbuloi më shumë për karrierën e tij si futbollist profesionist.

Duke diskutuar për veprimet e futbollistëve që i irritojnë më së shumti tifozët, bashkëprezantuesi Tom Ochoa tha: “Fishkëllima bie, loja përfundon dhe një lojtar e shtyn topin pesë metra larg dhe ndëshkohet me karton të verdhë. Nëse do ta bësh një gjë të tillë, merre topin dhe gjuaje jashtë stadiumit. Mos u ndëshko vetëm pse e ke larguar pesë metra”.

Foster shtoi: “Nëse do ta bësh, atëherë merre një karton të verdhë siç duhet. Duhet të paguash 10 funte për këtë. Duhet të paguash një gjobë prej 10 funtesh për kartonin e verdhë. Edhe profesionistët e paguajnë, sepse është gjobë e FA-së”.

Më pas ndërhyri legjenda e Wrexhamit, Ben Tozer, i cili tha: “Një karton i kuq kushton 50 ose 60 funte”.

Ish-portieri i Manchester Unitedit shtoi: “Gjithsesi, duhet ta paguash. Prandaj, nëse do ta bësh, bëje siç duhet. Është sjellje fëmijërore”.

Edhe pse lojtarët mund të përballen me gjoba shtesë nga klubet e tyre përkatëse, çdo futbollist që ndëshkohet me karton të verdhë gjobitet me 10 funte sipas rregullave disiplinore të FA-së, pavarësisht nivelit në të cilin luan.

Versioni më i fundit i manualit të FA-së përcakton gjobat për kartonët e verdhë dhe të kuq, duke përfshirë edhe pezullimet automatike dhe pikët ndëshkuese që grumbullohen për secilën shkelje.

Kartonët e verdhë shoqërohen me një gjobë fikse prej 10 funtesh, ndërsa gjobat për kartonët e kuq variojnë nga 35 deri në 55 funte, në varësi të shkeljes. Mohimi i një goli ose i një rasti të qartë për shënim duke prekur qëllimisht topin me dorë, si dhe marrja e kartonit të dytë të verdhë në të njëjtën ndeshje, dënohen me gjobë prej 35 funtesh.

Përdorimi i gjuhës fyese, ofenduese ose abuzive dënohet me gjobë prej 45 funtesh, ndërsa ndërhyrjet e rënda të palejuara, sjellja e dhunshme dhe pështyrja ndaj dikujt dënohen me gjobën më të lartë, prej 55 funtesh.