Luis Enrique ka dalë hapur në mbështetje të futbollistëve të Paris Saint-Germainit në garën për Topin e Artë 2026, duke deklaruar se fituesi i çmimit më prestigjioz individual në futboll duhet të vijë nga skuadra parisiene.
Fituesi i Topit të Artë do të shpallet më 26 tetor në Londër, ndërsa disa prej yjeve të PSG-së konsiderohen ndër favoritët kryesorë pas një sezoni të jashtëzakonshëm, të kurorëzuar me triumfin e dytë radhazi në Ligën e Kampionëve.
Khvicha Kvaratskhelia, Ousmane Dembélé dhe Fabián Ruiz janë ndër emrat më të spikatur, ndërsa Ruiz ka një argument shtesë pasi fitoi edhe Kupën e Botës 2026 me Spanjën.
“Ky është mendimi im dhe mund të jem gabim”
Në konferencën për shtyp para ndeshjes së xhiros së tretë të Ligue 1 kundër Monacos, Luis Enrique u shpreh qartë për preferencën e tij.
“Nuk më intereson kush e fiton Topin e Artë, por sipas mendimit tim, fituesi duhet të jetë një lojtar i Paris Saint-Germainit”, deklaroi trajneri spanjoll.
Ai vazhdoi:
“Ne i kemi të gjitha. Kemi lojtarë që e kanë fituar Ligën e Kampionëve, kemi Fabián Ruiz që fitoi Kupën e Botës dhe Ousmane Dembélé, i cili fitoi Topin e Artë sezonin e kaluar. Prandaj, për mua, fituesi duhet të vijë nga Paris Saint-Germain. Ky është mendimi im dhe mund të jem gabim.”
Gara për Topin e Artë pritet të jetë shumë e fortë.
Përveç yjeve të PSG-së, mes kandidatëve përmenden edhe Kylian Mbappé, Lamine Yamal, Harry Kane, Lionel Messi, Rodri dhe Michael Olise.
Përgjigje direkte ndaj Mourinhos
Deklaratat e Luis Enriques vijnë si përgjigje ndaj Jose Mourinhos, i cili kishte thënë se fituesi i Topit të Artë nuk duhet domosdoshmërisht të vijë nga PSG-ja apo kombëtarja e Spanjës.
Trajneri i Real Madridit kishte folur për këtë çështje në konferencën për shtyp para ndeshjes ndaj Malagas.
“Është një çmim i mrekullueshëm në aspektin individual. Hyn në historinë personale të një futbollisti. Janë rreth 12 lojtarë që janë në një nivel shumë të lartë dhe ne kemi tre apo katër prej tyre te Real Madridi”, deklaroi Mourinho.
Portugezi shtoi se, sipas tij, Topi i Artë duhet t’u jepet futbollistëve që lënë gjurmë të paharrueshme në histori.
“Për mua, Topi i Artë duhet t’u shkojë atyre lojtarëve që na mungojnë përgjithmonë kur pensionohen. Më mungojnë Maradona, Ronaldo Nazário, Messi, Zidane dhe Matthäus.”
“Topin e Artë nuk mund t’ia japësh dikujt vetëm sepse ka fituar Ligën e Kampionëve ose Kupën e Botës. Nëse dëshironi ta shpërbleni fituesin e Ligës së Kampionëve, atëherë jepjani Topin e Artë Luis Enriques.”
Mourinho: “Më i miri në botë është diçka tjetër”
Mourinho përmendi edhe trajnerin e Spanjës, Luis de la Fuente, duke vlerësuar suksesin e tij, por këmbënguli se çmimi individual duhet të bazohet në një kriter tjetër.
“Sa i përket Spanjës, De la Fuente padyshim e meriton vlerësimin. Por më i miri në botë është diçka tjetër. Nuk është e thënë që fituesi të vijë nga Paris Saint-Germain apo nga Spanja.”
“Janë dy, tre apo katër lojtarë dhe ne e dimë kush janë. E dimë edhe ku janë. Janë këtu. E dimë kush shkroi histori në nivel individual këtë verë.”
Mourinho nuk përmendi emra konkretë, por raportimet mediatike sugjerojnë se ai po mbështet Kylian Mbappén.
Sulmuesi i Real Madridit vjen pas një paraqitjeje të jashtëzakonshme në Kupën e Botës, ndërsa pas edicionit të sivjetmë është bërë golashënuesi më i mirë në historinë e turneut me 22 gola.
Me afrimin e ceremonisë së Topit të Artë, debati mes dy trajnerëve vetëm sa e shton më shumë temperaturën e një gare që pritet të jetë ndër më të fortat e viteve të fundit.
