Napoli me masa të shtuara, për ndeshjen e Championsit ndaj Arsenalit në “Maradona”

Napoli po përgatit masa të shtuara sigurie përpara përballjes në Ligën e Kampionëve me Arsenalin, me rreth 1,500 tifozë që pritet të udhëtojnë nga Anglia.

Sipas “TuttoMercatoWeb”, ndeshja është cilësuar me rrezik të lartë nga pikëpamja e rendit publik, duke bërë që autoritetet lokale të shtojnë vëmendjen dhe masat e sigurisë përpara ndeshjes në stadiumin “Diego Armando Maradona”.

Rreth 45,000 bileta raportohet se janë shitur deri më tani për këtë përballje evropiane, ndërsa çmimet e biletave të Championsit mund të kenë ndikuar që numri i të pranishmëve të jetë më i ulët se kapaciteti i plotë i stadiumit.

Megjithatë, ardhja e një numri të konsiderueshëm tifozësh të Arsenalit ka rritur shqetësimet për tensione të mundshme mes dy grupeve të tifozëve, veçanërisht në qendër të Napolit para fillimit të ndeshjes.

Fokusi do të jetë te menaxhimi i lëvizjes së tifozëve që udhëtojnë nga Anglia dhe parandalimi i përplasjeve mes grupeve rivale të tifozëve gjatë gjithë ditës.

Tifozët e Napolit janë lavdëruar për atmosferën që krijojnë në stadiumin e tyre dhe klubi shpreson që “Maradona” të ofrojë një shtysë të ngjashme kundër skuadrës së Mikel Artetës.

Megjithatë, prioriteti i menjëhershëm për autoritetet është të sigurojnë që ndeshja e Championsit të zhvillohet pa incidente.

Një tjetër takim për sigurinë ishte planifikuar për sot, ku autoritetet përkatëse tentuan të finalizojnë masat për menaxhimin e tifozëve të Arsenalit dhe ruajtjen e rendit publik në të gjithë qytetin