Nesër mbahet ceremonia e varrimit për Diogo Jotën dhe vëllain e tij

Klubi i Liverpoolit ka vendosur të anulojë testet parasezonale të planifikuara për një numër të vogël lojtarësh të ekipit të parë, pas lajmit të hidhur për vdekjen e sulmuesit Diogo Jota dhe vëllait të tij, Andre Silva.

Testet duhej të zhvilloheshin të premten në qendrën stërvitore të klubit në Kirkby, si pjesë e rikthimit të skuadrës pas pushimeve verore. Megjithatë, vendimi është marrë që kthimi i lojtarëve të bëhet në mënyrë të fazuar duke filluar nga e hëna, për t’i dhënë ekipit kohë të përballojë dhimbjen dhe të nderojë kujtimin e shokut të tyre të skuadrës.

Ceremonia e varrimit për Jotën dhe vëllain e tij do të mbahet nesër në Gondomar, në periferi të Portos.

Sipas raportimeve, Diogo Jota dhe vëllai i tij më i vogël, që gjithashtu ishte futbollist profesionist, humbën jetën në një aksident tragjik me makinë në orët e para të së enjtes. Ata po udhëtonin drejt portit të Santanderit, ku Jota kishte planifikuar të kthehej me traget në Mbretërinë e Bashkuar për të nisur përgatitjet për sezonin e ri. Kjo zgjedhje ishte bërë me rekomandim mjekësor, pasi Jota ishte këshilluar të shmangte fluturimet pas një ndërhyrjeje të vogël shëndetësore.

Ngjarja ka tronditur jo vetëm klubin, por të gjithë komunitetin futbollistik, që ka shprehur ngushëllime dhe solidaritet me familjen dhe të afërmit e dy vëllezërve.